المستقل – كتب : خالد الحميد الزبون
أكثر شيء بحزن، هو لما نوصل لمرحلة نسمع فيها أصوات بتشكك بمؤسساتنا الوطنية، وبتحرض على الأجهزة الأمنية والجيش… وكأن كل التضحيات اللي قدموها، وكل الأثمان اللي اندفعت، صارت منسية فجأة.
يمكن في ناس عندها ملاحظات، ويمكن في أخطاء بحاجة تصحيح، هذا طبيعي وصحي، بس نِخلط بين النقد وبين الدعوة للفوضى؟ نفتح الباب لخطاب بيهدّ الثقة بين الناس ودولتهم؟ هون بنكون بنلعب بالنار، وبثوابت ما لازم حد يعبث فيها.
الجيش العربي ما كان يوم مجرد مؤسسة، كان دايما رمز للكرامة الأردنية، وساتر بوجه الريح، وسند لكل فلسطيني تهجر من أرضه… دم الشهداء مش حبر على ورق، دم الشهداء جزء من هويتنا.
بنحكي بحرقة لأنه إحنا بدنا بلدنا أقوى، ومؤسساتنا أعدل، ومواطننا أكرم… بس ما بنقبل نخسر أمننا واستقرارنا على حساب شعارات براقة ووعود فارغة.
الحذر، كل الحذر من أي خطاب يوهم الناس إنه بيدافع عنهم وهو فعليًا بيفتح الباب للفراغ والانهيار.
الأردن مش بحاجة لصدام… بحاجة لعقل، لحوار، ولناس مؤمنة إنه الإصلاح بيصير من جوّا، مش بالتحريض من برا.
وما في أغلى من وطن حافظ علينا… لازم نحافظ عليه.
رئيس القيادة التنفيذية – حزب تمكين تحت التأسيس
